شعر / فالح حسون الدراجي

المقدمة:

لأن السلطات البعثية تعرف تماماً من هو ستار خضير( أبو مي).. وتدرك أنه ليس مجرد قائد شيوعي ومسؤول الخط العسكري في الحزب فحسب، إنما هو مشروع ثورة وقائد ثوري، لذلك سعت بكل طاقتها لتصفيته والتخلص منه !!

القصيدة:

عثر جدم الزمان وطاح والد مَي ..

عمت عين الزمان إشعثر من عثرة

إنكسر ضلع التحدي بموت والد مَي

خمس عقود محَّد جبَّر الكسرة

خمس عقود نآكل من لحمنه الحي

وحدر جلودنا مورثة ألف جمرة

عثر جدم الزمان وضاع أجمل شَي

لَهذا اليوم محَّد ناقش العثرة :

لماذا وليش وشلون الحصل والصار

أنه بگلبي بلاوي وأسئلة خطرة

سؤال يجِّر سؤال ونار تحرگ نار

وأمَّر من المنايا الأجوبة المُرَّة

إذا طاح الجبل معناها صاير شَي

لو ثمة خلل .. لو بالجبل ثغرة

وإذا مات النهر، موش العتب ع المُي

العتب كل العتب ع الما حمه نهره

چذب عين الشمس يكسر رمحها الفي

إذا عين الشمس متنمرَّة وحمره

د حط كل الظلام اگبال ومضة ضَي

وشوف شلون يشِّرد من تجي الگمره

إذا تقصير حاصل لازم إنقر بيه

والمقصِّر وجوباً لازم أنقصرَّه

ما أشك بالحزب هذا حزب خيون

أخوي الماتت أمي وما لگت گبره

ما أشك بالحزب هذا حزب هندال

لَهذا اليوم باسمه إتفاخر البصرة

ما أشك بالحزب هذا حزب وضاح

ميِّت، والأعادي تخاف تتذكره

ما أشك بالحزب هذا حزب بشار

وأتحدَّه النخل لو يوصل لصدره

ما أشك بالحزب هذا حزب شمران

إمام الصراحة وسيَّد الفكرة

ما أشك بالحزب هذا حزب طوفان

أبو ليلى الصبُر يتنومس بصبره

ما أشك بالحزب هذا حزب جاويد

حزب تلو وسلام وخالد وذكرى

ما أشك بالگمر هذا گمر فريال

وأنسام وعميدة وعايدة وبشرى

ما أشك بالشمس هذي شمس إكرام

وجواد العطية ومتي أبو سمره

ما أشك بالحزب هذا حزب توماس

أطهر من حليب الزاچية الحرَّة ..

أشكن ؟

أشكن بيَّه آني وما أشكن بيه

ورد آذار ياهو إيشكك إبعطره ؟؟

مطر تشرين ما يحتاج أي برهان

مثل ريحة العنبر ريحة المطرة

ما أشك بالحزب هذا حزب الانصار

من دم النصير إتشع الف زهرة

لا تسأل بشر خاف البشر تنحاز

روح لهندرين وإسأل الصخرة

مو بس الجبل يحچيلك إعله الصار

بأهوار الغموگة تشوف الف ذكرى

تفگ خالد وأمين لهسّه محتَّرات

وابو محيسن علم خفاك بالشطرة

ما أچذب عليك وداعتك مشتاگ

مثل شوگ البنات لفرحة الزهره

ولا أضمن عليك وداعتك عطشان

يرويني ودادك وأشبع بنظرة ..

يا أمي وأبوي واهلي والخلان

ياگمرة حياتي وأحلى كل گمره

مرات الكسر يثگل على المكسور

والمكسور ما يتحمل الكسرة

ومرات الظنون تهيج وسط الروح

لچن گلبي الصبور يلوذ بالعشرة

ثلثين العمر خلصته حب وياك

وما أريد بتوالي اسنينه أندمرَّه ؟

ما أبدل هواك ولا أغير الشوگ

ألف موته أموت وشوگي ما أغيره

يا طعم الثمالة وأحلى ما بالكاس

نخب حبك أشربه وأختم السهرة

جنت بأول صباي .. وأزغر من الطير

گلت هذا الكلام ولسَّه أنه أتذكرَّه

لو ستار ما طايح هذاك اليوم

چا فوگ الشمس راياتنا الحمره

ولو ستار ما طايح هذاك اليوم

چان الليل ناصي وعالية الگمره

ولو ستار ماطايح هذاك اليوم

جان أحله المدن بالعالم (الثورة)

ولو ستار ما طايح هذاك اليوم

چا روما العمارة ولندن البصرة

ولو ستار ما طايح هذاك اليوم

چا نخل السماوة أتطرَّه ألف سمره

ولو ستار ما طايح هذاك اليوم

چا هسَّه الرمادي أورود مو صحره

وجان الموصل اجمل من صباح الخير

وأجنحة الفرح بديالى منتشرة

ولو ستار ما طايح هذاك اليوم

ما شفنه حروب ونار مستعرة.. ولا شفنه منافي وليل الولايات، وعلى أبواب اللجوء آلاف منتظرة

ولو ستار ما طايح هذاك اليوم

چا ماكو فقير ولا بقت فقره

وچا اربيل ترگص چوبي وي ميسان

وبدهوك العزيزة تصِّيف البصرة

وچا بغداد كعبة وقبلة للأحرار

وكلمن زارها تنوله الف عُمره

وچا بابل أنيقة وأحلى من العيد

ولعزها ومجدها تعود سامره

وچا واسط قصيدة بشفة الأنبار

وأبو الطيب عليها يبث عبق شعره

وچا وادي السلام أگبوره موش گبور

بل مليون نخلة انزرعت  وشجرة

وچا هور الچبايش أحلى ما بالكون

لوحة من الخيال الباذخ بسحره

لكن للأسف طاح الگمر مغدور

والتاريخ كاتب ملحمة غدره

طفه غفله النهار وضاع سِّر الليل

وهاي اسنين محَّد گادر يدوره

إنكسر ضلع التحدي بموت والد مَي

ولهذا السبب ما صارت الثورة))