* حسين جهيد الحافظ
على تيغه وطنه
رفرفت فختايه بيضه
ومن صدر شباچ الوطن
ناغاهه بلبل
من قفص گلب الشعب
فرشوا الجنحين فرحة
إنرسم بيهه الحلم
مرجوحة إو صفگه إو أماني
والصبح يمطر أغاني
غنوة شفافة إو حزينة
إو غنوة ترفة طرزت شفة طفل
ادموع الفرح ..
شمعة او ضوه
أحديثه او غوه
رية او هوه
عيد او كرنفال او حفل
سن الضحك خضر حقل
أبفيه السنابل هلهلت
رغم العسر
فرحة عمر
بوسة عرس
ترچية وي خد الشمس
تنثر عشگ كيف إو ونس
شهگة محب
بشفاف تعبهه الوكت تعزف لحن
بيه الوفة أيطشر وفة
عشتار وابهمة زلم
لغنيدة منذور الحلم
شايل تباشير الأمل
لمة أهل
ممنوع يا طاري الزعل
غفلة وكت لن الوكت
خنجر حقد
شگگ تصاوير الوصل
غربة او هجر ما ينحمل
دم الدمع
كسرة ضلع
تنزف محن
غربة او ضياع إبنص وطن
– يا بو الحسن –
– ضيم او ليالي امسودنه
الوحشة سكن
لا يا وطن
لا يا وطن
ما چان أبد هذا المظن
لا يا وطن
لتگلي حيث إو طالما
لا ريثما
لا واقع إتگول إو إذن
لا يا وطن
ذني سوالف عالسلاطين او مضن
رد بينه الأمس الجهل
إلمرجوحة العيد الغافية ابچلمة همس
للشوگ لسوالف أمس
الشباچ حجرتنه الزغيرة
العاشگه اخيوط الشمس
حب ابهمس
فرحة عرس
بوسات واخدود او غنه
ايردد صده
ورده او نده
فختاية بيضه امكلشه
اترفرف محنة او طيب
تنزف وفة ايطرز الزمن
حب الوطن
بيرغ صدگ
شوگ او عشگ
رضعت محبة امن الزغر
مميه واسنين العمر
منذورة ولعيون الوطن
أحلة نذر
شيشة عطر
حنه او كحل
لعيون شيرين او سحر
الشبعاد واكرام او سمر
ردني الهلي
ردني ترانيم او صور
ردني الوطن
آ يا وطن
بيه الفخاتي إتنام
تغفه إعله السطح
لا شبچ
لا صايود
لا چلمة ذبح
نور إو صبح
و امسامر الحلوات
مرهم كل جرح
بيه حلم ومضة أمل
بستان فردوس إو حقل
بسمة اعله شفة كل طفل
فرحة عرس
تحضن شبابيچ الشمس
رغم إلأسى والليل
قاسي إشگد نحس
(تبقه الشمس
ببلادنه أجمل شمس
أجمل شمس)
