*حسين جهيد الحافظ 

سفينه انته

سفينه او صبرك إشراعك

تطگ بارود من تغضب

تتمزهد على الباعك

چبير ابگد هوه الدنيه

عزيز أهلك

عزيز الناس

هنياله وألف هنيال من طاعك

حرز تنشد على ازنود الوفة

إو تيزاب عالخانك ..!!

اتطگ گاعك

شربكنه الضلوع ادروع

واعلگنه الدموع اشموع

غيره اتغار من غيره

ركضته الصوت فزاعك

ينبض الدم

يا شريان شيمة شوگ

إيخسه كلمن يظن إيلاوي اذراعك

يقسمونك ؟

حلم سكران

حچي بطران

عصّي اعله الگال من ساعك

إمام اترابك إيشور

إيعثر من يسحگه ابغيظ

وأطباع النبي أطباعك

يبو النهرين

 واحد ما تصير إثنين

محروس ابوفة العباس

وبدم الشهيد حسين

إكحيل إمأصله

وابچف ابو الحسنين مصراعك

مطلاعك شمس ,,,

 يكشف ظلام الليل مطلاعك

مضروب المثل صاعين رد الصاع

بس يا ويل واشحده اليرد صاعك

عزيز الناس

بيدر من وفه او إحساس

وهمان او ألف وهمان

كلمن ظن !!

يغير طيبة أوضاعك

إشكثر وإشجم سقيفة

او يشهد التاريخ ..

يستاد الخلگ

عقدتهه صناعك

إو بقيت انته !!

هذاك انته ..

العراق إليكبر اعله الضيم

راسك فوگ هام الغيم

تِرف بيرغ  كرامة

أبزحمة أوجاعك

آلامك چثيرة..

 ابكثر طيب البيك آلامك

وأحلامك چبيرة

ابكبر دنيه الناس أحلامك

تتحده الوكت

والكون والآلام

اتوچه اعله ناسك شدة احزامك

ناسك ناس ..

ذبت روحهه اعله الموت

صاري ‘و شالت إشراعك

عراق الطيب

يا ارهاب

 يا داعش

يگدر يلوّي اذراعك

وإذراعك أمان إمن الجبل للهور

عصّي اعله الخان والباعك

 عصّي اعله الخااااان

والباااعك