* كامل الركابي
يا الهي
الغابة هاي
شگد جميلة
شكد رهيفة
ليش مابيها بشر يمشون مثلي؟
وانه وحدي
امشي درب الغابة
وحدي
بروحه يفرشلي الطريق
ورق بيه الوان طيف
ساحر وناعم رقيق
والله بعد شويه من بْعيد
لمحة
وخطف ارنب
شبه مذعور
بقلق
جسمي تكهرب
بعد شويه لا والله
شفت ثعلب بعيد
اللون بعيونه مثل كسرة زجاجة
الضوه عاكسها على عْيوني
لهب جمرة
نقل بيها احتجاجه
گلت هذا السبب مابيها بشر
يمشون مثلي
مو مهم
ثعلب بلايه قطيع
مايفك رجل الدجاجة
آه يويلي من شفت
حيّه تموج
الطول چن مترين
چن عدها زعانف
حية
ممتدة رمادية بحراشف
هسة لا ماكذبت
لوگلت خايف
ورجفت رديت عارف
ليش مابيها بشر يمشون مثلي
وگلت ما التفت
بس
اعيوني لمحت من بعيد
دب ضخم عالمجرة
واگف
گلت محد شافني أنفذ بجلدي
يانبض گلبي ْبهداوة
صرت أسرع
من خطوتي
من وصلت الشارع
اتحسست راسي
ردت اگولن بالسلامة
بصوتي
متگطعة أنفاسي
ثاني يوم الصبح
من غبشه انتخيت
جبت صحباني
وجيت
الغابة هي الغابة
وانه ماجبتلها طاري
ولاعلى خوفي
حچيت
والدرب نفس الدرب
نفسه
اعتنيت
صاحوا بصوت الشجون
ياالهي الغابة هاي شگد جميلة
شگد رهيفة
گلت وي نفسي بعد ما بانت
الصورة المخيفة
مشينا
ابعد من مكان البارحة،
وگلبي فضحني
گلبي يخذف من رجيفه
ياحبايب
لا تكذبون
اكتشافاتي
السخيفة:
الحيّة طلعت جذع شجرة
ميتة متوسدة التراب
الارنب على التلّة صخرة
الدب جذع محروگ اسود
طالعة
من اجتافه صخرة
