* ريسان الخزعلي
* ما ينمحي…،
بينه العشگ تطريز.
ما ينمحي…،
بينه الحزن تطريز.
ما ينمحي…،
بينه الموت تطريز.
كلهن سوة، نفس المخايط والأبر…،
بينه العشگ والحزن والموت تطريز…!
. . . ،
*.. يبتدي عشگ الزغر، شوفه تحِنص الماي،
ركضتنه نهر بالصيف، روجه إتبوس روجة النهر،
واحنه اخيال باس اخيال، والضحكات بتراب الدرب
للعشب فكّن باب، واليلحگ بَثرنه إيلم خرز
طوگ انگطع، والرگبه تطش إخيوط فضه إتدلي
اليتيهون، نركض عله إخيوط السمه التايه
مدري وين إيريد..؟، والبستان شگ زيجه
إو تلگانه، التعب ذب روحه گصيبه وشبگه
ما تنفك، گلب يسمع گلب واعيون ما شافت،
والمغرب ندهنه ابچف نده، دلاّنه عله ابيوت
الأهل نتعثر باسامينه، ابفوانيس الصرايف
شفنه ورد اخدودنه امصوفر، وافراش الگصب
والبردي، طيّات الضلوع أخضر يلوّنهه،
/صُفار او خُضره/ بالفضة يشبعن نوم، وابساع
الصبح باصبع ضوه للمدرسة ايگعدونه، وابدوره
رغيف اوجوهنه انرسمت.
. . . ،
كبرنه..، او بالصدر فز الحمام، فزعت الدنيه
علينه، شامة شامة وحَب شباب، البوسة
تشتلهن سوه، او بعده ليهسه العشگ بگلوبنه
إويه اشفافنه إيغني،…….
العشگ تطريز.
– – – –
* الحزن..، من گصّة السرّه، إويه الگماط إندار،
وابشربه المضغه إو هزّة الكاروك متعلگ.
الحزن..، ويّه النبوّه ابنص بحر يسبح، واشفاف
الحليب إعله الثدي اتصفگ.
الحزن..، چان ابصور عالطين يحچي، او سومرية
الواح / لعبت بالزمن حدّين، حد طوفان، حد
السنبلة إبنص اليباس اتطگ
شو، لا جد، لا أبو، هز الفرح گلبه،
إو نسه الياغيم سرحه خاطره ايودي..!،
الحزن صايه وعگل فوگ اليشامغ تنحفر بالروس،
وانباهي، الحلم، باچر نضيّف الشمس بالربعه،
صواني الچاي بيهه اخدود طاحت بالحلاة والهيل
مديورة، والفنجان ضحكه أسود، دخان الجگاير
ما دره اشيحرگ..!
نسه التاريخ ما بين الأصابع يحترگ سكته..،
والتاريخ چذبه كتب/ ملّتهه الرفوف، إشما
عدلنه إحروفهه الصفره، أصابيع الجمر بكتابنه إتشگك.
غاب الصحو بغيومه، مامش صحوه لترگص الرمش
واترش كحل فوگ الخبز، والناس بالشارع
فرح يتراكض ابلا طول، والصوت ايتلون بالضوه
امرايات: يا نهر الفرح، وين الفرح يالجرفك
ايغرگ..؟!
يا باب السمه المسدود، مو ملّت صواني النذر،
شيفك الحزن….؟
– هذا الحزن تطريز..؟!
*.. يعتگ كل عشگ… لو چان تطريز
ينفك كل حزن… لو چان تطريز
. . . ،
سر الموت…،
لا يعتلگ ولا ينفك، لا يعرف عشگ، لا حزن،
لا ينلاح خيط ابرته المسمومة…
ايخيّط بالعمر تطريز..!
