* ريسان الخزعلي

( 1 )

.. لمّن فتت..

كلشي اوياك راد ايفوت

فز امن القميص الورد..،

واتخطاك عشر ابيوت.

ولا عِثرت اعيونك..،

تلگط الطايح اعله اهدومك ابحمرة توت..

هذا آخر جرح..،

ليش اسود..،

ابخصر ايدك تشدّه إعله البياض ابتوت..؟!

انتَ التسمع امن النده حس صبّيره وكت الموت

ولا چنّك تريد اتشوف..،

حزني اشلون عالي الصوت..

مثل حزن الگصب..،

يتسولف اويه الماي بالبسكوت…

(2)

.. ولو..

ولو مامش نوم بالجنّة

چان السمه..،

إيريد إينام بالنفنوف من سولفوا عالجنّة.

وانتَ المو مثل طرواك ما ينلگي بالصفنة

اشوفك..

گبل..

وجهي..

الصبح..،

وامرايتي اتچذب..،

انتَ ابعيد ما تنلاح..،

بس من شوفتك بالنوم ما جزنه.

….،

چذب من گال نوم الجنّة..، موجنّة…

( 3 )

.. كل ما بيك..

كل ما بيك من لذة..،

مثل الحلم..

ما ينجاس..، بس إيجيس.

…،

انتَ إبلا وجه..،

وامرايتك /نرسيس/.!*

*نرسيس/.. شاب جميل، تقول الأسطورة الأغريقية إنه افتتن بجمال صورته في الماء، فذوى جسده وتحوّل الى نرجسة.