* صباح الهلالي

من اتراب مثلي نعم… بس للجمال اسباب

رب الجمال اعتقد …. سواك في محـراب

اباب جنة عدن…. تين ونخل واعناب

بقالبك خله عسل…. وشويه ذبله تــراب 

بسواد العين يسمر من ترابي

شعجب گلبك تغير من ترى بيه

انا ما اظن ترابك من ترابي 

حضنتك والعسل جلّب بديه

من طين مثلي ..نعم ..بس عود جنك طين؟؟

ذرات منك بقن… لمهن وسوه العين

عشرة بالمية ندى…ويمكن ورد عشرين

ومد روحه نهر الخمر كملك السبعين

سلالتكم من نسب يوسف نسبهه

الدنيا بغير نظراتك نسبهه

الوادم مية بالمية نسبهه

بس نسبة جمالك سبع مية

وسبحانه كمل بعد فوك السبع مية

رش اعله گلبك وفة وعالروح حنية

وانطاك واهس طفل وعيون حورية 

بس؟؟؟عافك بلا بخت وتورطت بيه

واللوله البيك جي مابيك لوله

ملاك امن السمه البالمهد لوله

جمالك ماتجاوز بشر لولــــــه

الخمرة اويه العسل طبگن سوية