* جمعة الحلفي
بساتين الورد
من يا نبع مرتوي؟
من يا غصن تفاح جْبت ألوان لخدودك
من يامجرة نزلت
من ياسما وياگَاع لميت الْهوُه لْعودك
وك أنا مجبور..
أنا مجبور بعيونك
خليني لْبساتين الورد ناطور
مَحّدْ يوصل حدودك.
غصن التين
يا مايْ ليوصلنّي لْبساتينك؟
يا نسمة؟
يا نهر الْيدلّيني بغصن تينك؟
وك تِعَبْتْ وتعبتني وياك
وديت العمر.. كل العمر خطار
بلچن ترحم سنينك
تداويني؟
شتداويني وانا مبضّع على طولي بسچاچينك
حسافة اعلى الزمان الفات وياك
وحسافة عليك، فرّطت العشگ عالرايح وعالجاي
بس وياي ما عدلت ميازينك
روح بلا عتب ما تسوه حتى عتاب
إلي ديني وإلك دينك.
نوم الحمام
مثل نوم الحمام ينام
يسكر بأول الكاسات
ويتثاوب غنج من أول الگرصات
وآنه…
آنه اصبر صبر هايم
ياشباچ روحي..
يا هواها وليلها وقنديلهه الدايم
چا نهش ظلالي من النوم
وانتَه النوم كله وياك نايم؟
