* سمير صبيح
شيعوضني الدمع واني الخسرته هواي
وعلى رملة امل كل عمري وشلته
انا الباكو نهاري ورحت ادوره بليل
وبالمسودن طبع ميعوف سالفته
على نفس الدرب ذبولي بس الصوف
حتى ارجع وكول اذياب ماكلته
وانه الما صبر والعطش ما وازاه
دنت نفسه وذبح بالصحره راحلته
كلب ماجنه كلبي جني متبني
جرعته التعب مايوم دللته
طفل من ايده اكوده وهوه يمشي وياي
وعلى ضحكة بكهف للموت نزلته
انغلق باب الصبر كد ما ادك عليه
مو خالي كرم بس اني مللته
بعد ماهد سهم كون الطريدة بعيد
مابيها فخر لو كول وصلته
وشفت عصفور ميت كل جرح مابي
حرت ها يالمنية شلون واصلته
شلت راسي وشفت بالشجرة عش محروك
كلت هذا السبب والحركة كاتلته
ونفس موته متت والجسد لعد الروح
وحسرتي بجفن وبدمعة غسلته
سل سيفه الزمن هل من منازل صاح
اعزل ماخفت والزمن قاتلته
صح مالحته ابد لكن ملاني جروح
بس عندي المهم ماعفته قاتلته
بسك ياضمير الصار بيه هواي
بسك هالعمر ما يوم جملته
