* ميثاق الهلالي
خسران يالعفت.. ما تلگه مثلي بعد
ولا الگه مثلك بشر
وكلشي بغيابك ذبل
من عشرتك مابقن بس الدمع والجرح
وليلك بعد لايجي
بعيون الأستبطتك.. بيّن درب للصبح
والجرح مو مثل امس، يتوالم ويّ النزف
صدگني ماصدگت
شحلفلك بيا جرح؟!
گتلك وحگ خنجرك
هسه الجرح يختلف..
هم شايف أنت جرح يحلف براس الرمح؟!
هيچي انه جرحي …وبعد
شايل براسه خلگ يضحك بوجه الملح
وكل هذا وأشتاگ ألك..
وأرسملك عله السمه ليل ومحنة وشمع
وخليني أسولف دمع
بس خاف أچذب اذا گتلك؛ فراگك سهل
لا والله ماينجرع….
وأسرارك تسودنَّت صارت براسي جبل
وكلشي بغيابك ذبل
چان الدمع من چنت
يرسم حنان وصور..
هسه الدمع من رحت
كل دمعة خطوة سفر
وشيفيد بَعدْ الحچي
هوَ الگلب وانكسر..؟
والعين مومثل أمس
تشرب حنان الصور
وعيونك تغيرت، خيّط رمشها السهر..
وكلشي بغيابك ذبل
من درت وجهك صدگ
دارت وجها الشمس..
وماظل خلگ للنده
واهس الوردة انكسر..
وانساك!!
هذا حچي…
ولاچنّك انتَ الگبل تجرحني وأنزف ضحك !
من رحت كلشي طفه
بغيبتك حته الگمر
ماسيّر اعله الورد
ويالعلمتني الدفو
حته الدفو البلحچي غيّر لهجته البرد
وآنه وبقايه الصور
تانينه غيرك يجي
بومضه .. بقصيدة .. بشطر…
ولامطرت بغيبتك
زعلانة كلها عَلَي
گيعان روحي صبخ
شيسوي بيهه المطر؟!
يالمدري شنهي چنت
فراشة مدري ورد
حته اترف من الترف
لاتنسه چفي الگبل
شد رايته اعله الزلف
وفراگك شگد صلف
خلاّني بعدك جرح
وانت وضميرك بعد
من تضحك اعله النزف.
