* رياض الركابي 

بعد عطرچ أبطَّي إثيابنه يفوح ..

وبعد بوساتچ اتطرّز ادينه

وحشه الليل بغيابچ نگضّيه

او عگب حضنچ ولا ليلة دفينه

روج الحزن عالي ، وطاح الشراع

احسبي ايام غرگانة السفينة

بحديقتنه او وردها ، او فوگ الاغصان 

لو تدرين .. چم دمعة لگينه

ابغيابچ .. شمعة صرنه ابرحمة الريح

الف مرة اشتعل دمنه او طفينه

اليصبّرنه يگول العوض بالجاي

ما يدري الثلم ، ماخله بينه

صح نضحك .. ولكن ضحك مجبور 

واللمّاح ابد ما تخطي عينه

ما انطت ابد حصتنه للغير 

ويانه الدنيا بالشوغات امينة

ونگللها اكتفيتي بالاخذتيه ؟

وبعدني اتگول .. وتأشّر علينه

لو بالمال وفيّناها الديون

المطلوب ابعزيزة اشيفك دينه؟

بدم اگلوبنه او گوّة اشتريناچ

او ملكنه الدنيا من يوم اشترينه

حمامة بيت روحچ كل مسا اتطوف

لو تنباع .. هم تبقى حنينة

مثل مجرى الندى بخدود الورود

ما غثينه احد من بچينه

وذا بطل يهل اهلال عالناس .. 

ذيچ اللحظة گولي احنه نسينه.