* رحيم العراقي

أنا و همومي 

أنا و همومي

على مدالله .. نبقى ..

لا اطيب.. و لا يهودن ..

ولاني صاير مثل غيري

ولا مثل ما كَالت الوادم .. إمسودن..

و أحسب إطيوري بصابيعي 

بعدد سنوات عمري

و ضاك سطح البيت وطيوري يزودن ..

انا مطيرچي لهموم

اشما أطيرهن.. وره ساعة يعودن..

……………………

الشوكة و الوردة

 انتَ يا حبيبي .. الشوكة و الوردة 

و انت اللي تكرهه الروح و توِّده

الله ما خلق إنسان..إلا وطينته ابخده

بس انتَ بخدودك كَيمر السدة

حبيتك .. قبل ما شوفك ابمُدّة

حبيتك… قبل ما كرهك و بّعده 

وحبي إلك..

حب إنسان تايه.. ماعرف حده 

ولا متاكد انتَ اوياه.. لو ضده

..وياما جيت أنهي البيني وبينك

و أرجع بالسؤال الذابل إبعينك ..

و انسه اشقررت بالروحة و الردّة 

و أتخيلك كُلَّك طيب ..وأسلوبك

إيحيّرني وأدوخ وأّتجه صوبك

و وينه اللي يريح الكَلب ويبّرده 

و وينه اللي بهذا الزمن.. يتهّده 

حبيتك لأن طيب

لأن شفاف.. وحبيب..

و جمالك زاد عن حده 

جمالك زاد و..تعده 

جمالك.. وإنكلب ضده..