* كاظم إسماعيل الكاطع
بانتظارك خلصت عمري انتظار
عاشرت ليل المحطة
وارتجي ايجيبك قطار
والقطار !!
لو يحب مثلي .. وتشب بضلوعه نار
يسرع ابمشيه ويجيبك
بالفجر قبل النهار
ولَو تعبني انتظارك !!
شارك العمر ابسنينه
إهواي كالوا مايجيك !!
وكلبي جاوبهم يجينه .. يجينه
ناشدت كل روجة عنك ؟؟
كل جرف كحَلت عينه
وإسألت كل الشواطي ؟؟
بلكت اتجيبك سفينة
!!!! ولا سفينة … ولاقطار
وخَلصتْ عمري انتظار !!
لا قطار ولا سفينة
وآنه والليل ابأمل جَيْتَكْ علينه
طيح يا دمع النده وكًطر بِدِينه
احنه ليلية انتلاكه
نسهر آنه وياك ياليل المدينة
آنه عيني عالمحطة
وإنته عينك عالنهار
خلصت عمري إنتظار
