بدر ما مات..

حي..

باقي بدر ما مات..

خالد للابد ما ينخفت بدره..

واذا مات الغريب اعله الخليج إيصيح

إذن.. ظل الغريب اليسمع الشعره..

بدر.. ورد البنفسج. عالگبر خطار

يوميه يفتح بس إلك عطره

بدر.. حته شناشيلك بچت بالليل

لأن شباچ بيتك يعشگ الگمره

بدر.. حته – بويب – اشتاگلك لهفان

مثل سعف النخل من ينحني النهره..

بدر.. شط العرب

وجهه غريب اوياك

مثل تمثال طولك..

من حزن فجره..

بدر.. شمس العراق أحلة

شمس بالكون..

وشمس هذا العراق

إبكل وكت شگره..

بدر.. حته النوارس سافرت وياك

لأن.. ما مش بعد عينك..

لگت عِشرة..

بدر..حته زمانك ما رحم وياك

وزمانك «يا بدر»..

خجلان من عذره

بدر.. چف الصبر

مزروع بيك إهموم

ويا چف.

بالصبر يتراهن إبصبره..

العجيبة.

البيك. روح إتحوم

فوگ عراق

وعراقك روحه بيك

إيطوف عالبصرة..

يا فيض الشعر. بسمك يّفيض إعتاب

نزف حته الشعر من

همل ابشعره

افك باب الشعر الگيك

ألف ديوان..

وألگه الوطن همك.. بالگلب جمرة

بدر.. قصة حياتك دونت تاريخ

بس تاريخ عمرك

ينحسب عمره..