* مهيمن العكيلي
الصبح سد ريحة ضواه
گبال روحي الموت تارس خوفهه
وعيني شربت من گفاها أحلام رخصت
وصوت مات
وشيعوني إحچاية خرسه بلا جنازة
من يمر طاريك اتيهن بين كل صوتين صاحنلك تعال
بين كل شفين طبگت عالجگاره
وانتچي اعله الليل غفله بلايه صوتي
ردي دم طايح على امتوني وحچيهم ما خلص
ردي هم تارس جروحي وما حچوا عمرين من عمري نگص
ونگلة اجدامي ثگيلة
وصوت همساتي ضجيج
واقوه صوت بحلگي ما يوصل لأذاني
يا دفوشميسة الكانون نامي
نامي بس لا يتعب إعويناتچ بنظراته..
يترفه بلون عطر امي
صوتي بي لچمة نفس
خرخشت روحي وما بعت شهوة عيوني الشوفتچ
صوتي بي لچمة نفس
والنظر مد روحه اعله دربچ شبر ومعاتب لبس
إدني يمي هواي مشتاگ أرد اشمچ
سالفة بروحي أرد المك
وانته دخان وتعده بليل مترب
يتعنه المشامر خلك
شمس من تريد تغرب…
