*  أحمد المرشدي

اشتهوني وما رضيت انگاد ذموني .. وبست روحي!

سلام الله على چفوفي وعلى عيوني وعلى جروحي!

غفيت ابريسم بوكت الوجوه تراب الحمد لله ضميري شما عتگ فضة!

هواي وجوه ترخص يم المرايات وانه اكره اليتشضه!

بچيت بستر مثل الگاع سِنبل طگن دموعي!

انه ربعي الثگل والليل وشموعي!

شبعد وافرح بكل حزني ؟ مشه بجفني الحلم للبير!

عطش ملگه اعله كبر الكوس ولا جربة صديج اتدير!!

تچويني المواقف والشمس صوبين واتفگد الوادم ولا غيمة هااا!

والتذ بالألم والبس السكتة اثياب واصد اعله العيون اشاا!

وتهب شرجي الچفوف الچفي كل ما گول ذاااك الفيّ ..

واتعوذ الرفگة واشتري الحيطان وامد لظلمة سفرة ضي ..

ماضميت وجهي بلون سهل ويلوحني العابر

اركض عالوهم حد فحطة اجدامي وارد عطشان ومكابر

احب روحي صدگ غنت جروح الناس واصفگ دمع من اقره بجرح شاعر

بس لشوكت ؟ عمري ينشره وينباع

من دمي رويت شچم نهر عطشان واتطشر سواجي وداع

مو مليت اصد الصدري مدري شچم عرش خالي!

چم هلال صغته من الضوه البالروح وگالتلي السما هلالي

ملل ترس السچچ والغيم جنطة هم/ شلي بخيوط ماگطعن نزيف الدم

وشلي بصاحبي الماشوف بعيونه الوفة محزم

يااااگلبي السهر ع الناس منبت شيب!!

الأبيض مو حلو والدنيا دنيا ألوان صفة بيهه الچذب مو عيب …

لم نبضك وطش حزنك بقايا احلام!! وتيه بزحمة اليغفون

واكتب دمعتك عالماي حزنك من گلب وعيون!

وسولف جرحك ويه الصبح بلكي يطيح/ بلكي ارمادك اتهب فوگه زفة ريح

وبعد هدهه الگناطر كـــل حيااااتك بـــر!

والآمك ارباحك خلهه ضل وياك ذكرى الرفگة الخنجر/ ذكرى العشرة الخنجر