غيابك طيره بحريّة

غيابك كلمة محزونة

بغيابك اجيس الرغبة مجنونة

وينبّع ورد من بين الاصابع..والمودّة تفيض

بغيابك…اجيس السكتة مجنونة

مثل كل يوم

امد روحي بمسافاتك… تصل تالي الحلم وترد

اهب كل شبر بغيابك ولاية

المطر بيها صديق الناس

بأيامك، دخلت بين الحلم…والشمس..واسوار المدينة

وكلمة الناس

والناس بثيابي حچي

وتخاف من حبك عليَّ الناس

صوتك طيره بحرية

الملح بالروح سافر

والجنح بالصيف گمريه

احن مثل الجنح للصيف… وانزف روحي ليليه

غيابك مد جنح بالروح

اعبر رغبة النهران

اخذ جرف العشب مسموم

بثيابك تسيل الوان

خلص صوت الحنين…ودارت الأحزان

اخذ كل النهار اسرار

و افتح بالليالي النار

واحرگ كل جسر بالروح

واكسر دمي يوميّه

افيض بكل نهر… حزن التراب…وشهگة الاشجار

حنينك يوجع ايامي…

واطراف الاصابع تندل الاسرار

غيابك وطن للاسرار

بحدودك ركد دمي..وترسني ايام مشتعلة

ورق…بين الحنين…وبينك..وبين الكتابة

ورق بالريح…

كل لحظة امر بالنار

يرسمني اللهب

فوگ النهر

فوگ المدن…والاشجار

حبيبي قصة محزونة

وغيابك محنة الاسفار

15 /4/ 1977

من ديوان -أيام الشمس