* رائد الاسدي

هو الوطن واحد قسميته شلون

واحد موطني ما يقبل القسمة

اذا رايد تحل مشكلني بالتقسيم

انه اعرف الوحدة توحد الكلمة 

انه عيون ليل و علي ما مضموم

كلشي البيك اشوفه وكلشي افتهمه

صح دمي نعجن بتراب هاي الكاع

بس يحرك حرك لو يحترك دمه

اذا شبت النار بكاعي اصيرن ماي

وصيرن نار وحرك كلمن تحمه

الوطن جرحه اعلى طوله وما يريد جروح

الوطن جرحه جبير يريد اللي يلمه

شلون تريد كاعي تأيد التقسيم

وتراب الرمادي الهور يشتمه

شلون تريد كاعي تأيد التقسيم

والموصل تغني بطور العمارة

شلون تريد كاعي تأيد التقسيم

وشعلان ابو الجون بجفة مكواره

لتظن انه ساكت خوف لو مرتاح

سماك الساكته على الغيم مطاره

لتظن انه ساكت يعني ناسي الفات

تره التاريخ بعده بحيل ثواره

اذا جيفاره مات وخلده التاريخ 

تره بارض الوطن مليون جيفاره