* نوال جويد
اليوم راح نسولف عن ظاهرة اشتهرت بها النساء الجنوبيات امهاتنا وجداتنا وهي ظاهرة الدك على الوجه والجسم بشكل جميل، اضاف اليهن جمالا فوق جمالهن. والدك هو النقش على الجسم والوجه بطريقة بسيطة ونقوش جميلة لزيادة الجمال، ويعتبر معلما من معالم الجمال آنذاك .. صعب العمل جدا لقلة الوسائل المتوفرة ,, وكان شعارهن للتخفيف من الالم ــ( اليريد الغوه يصبر على الاحو )ــ وكانت النساء تصنع منه حواجبهن التي حل التاتو محله في هذا الزمن ومن الوشم وشم اليدين والخدود، وكانت تستخدم الابرة وقليل من الرماد (الصخام ) لعملية الدك …واكثر من يقوم منهن بالوشم هن المتزوجات او المقبلات على الزواج فكما عرفت انه اذا انخطبت احداهن اول شيء تفعله انها تروح للداكوكة وهي المرأة الخبيرة بالدك وتقوم بنقش جسمها ووجهها ويختلف الدك من منطقة لاخرى فنساء العمارة وشمهن يختلف عن نساء الناصرية فدك العمايرجيات يدكن بالحنج خط عدل ينزل للرقبة والصدر والبطن اما الناصرية يدكن دكة مدورة بالحنج وينزل للركبة والصدر والبطن والمتعارف عليه انه الكل يدكن الحاجب والبنت الشابة تدك ثلاث دكات بالخد الايمن والحنج وبين الحاجبين اما المتزوجات فذني مسويات اجسامهن خرايط اما دك المناطق الغربية يختلف فيدكن بخدودهن ويدكن بين الحاجبين شكل هلال والكرديات يدكن نهاية الخدين ..ومن الدگات التي كانت معروفة في مناطق الغربية (الشوحي)وهو يشبه الحزام العريض حول منطقة البطن و(الفرنجيات) وهي تشبه القلادة حول العنق الى منطقة الصدر..والشگالي ..وعيون البوم..الخ..حيث كان الشعراء الشعبيون يتغزلون بها في شعرهم ..ويتغنى بها المغنين في مناسباتهم..ودبكاتهم وأغاني الحصاد مثل.. يالداگه الشگالي.. يالريتچ بعد أعگالي.. مو گلتلچ تعالي هدوه من اليل.. يالداگه أعلى الزردوم .. عيوون البوم.. اني مسير علالكرود ألحگلي.. يالداگه أعلى أصبعه گلبي أتبعهه.. لوله الحياة اتبعهه ابظلمة وليلي.. يالداگه أعلى الثديات فرنجيات.. گلبي يحب البنيات المنجيلي.. والدك انواع وله اسماء فالوشم الي يكون بالرجل او بنهاية العضلة يسمونه (البكشه )والي يكون بالافخاذ يسمونه (الركاعيات ) والي بالرقبة يسمى( الغرنوك ) واحيانا الدك يسمى باسم بعض العشائر مثل اغنية المطربة عفيفة اسكندر من تقول (يادكة المحبوب دكه خزعليه ) هذا بالنسبة للدك الجمالي ويبدو ان بعض الرجال من عشائر العمارة نالهم نصيب من الدك فكانوا يدكون نهاية العين الصدغين او مثل مايكولون اهلنه (المواضغ ) وايضا يدكون على كف اليد للجمال وهناك انواع من الدك يستخدم للعلاج عند اهلنه فكان الطفل الي ارمد او عنده ضعف بعيونه يدكون اله على منطقة الصدغين وكذلك اكو مرض يسمونه (ابو دمغه )فياخذون الطفل للعارفه وتقوم بالدك للطفل بعلباته وبمنطقتة الصدغين وبالبطن تدك اله دكات واحيانه يستخدمون صره بيها مجموعة اعشاب ويقومون بكوي الطفل بيها بمنطقة الهامه هذا بالنسبه للدك العلاجي وكان للاعراس والمناسبات نصيب لصاحبات الوشم من (الكولات )ومنها كانو يكولون : فدوه المحبسج والدكت ايدج . كلبي بعازتج يبجي ويريدج. …وبعد من الكولات على اللي يدكن.. يام دكات ليلو يام العمامه. عونه الشافها وتصير جدامة . هاي اخت الشمكلي اليرفع الهامة . و دكه على الخد مرسومة … *سمره مدكدكه كل الحسن بيها *مرغوبه ام الدك الناعم لان كانت تعتبر المرأه الداكه هي الجميله عدهم ومن الحوادث الطريفه الي ترويها احدى الجدات العمايرجيات تكول بيوم من الايام كنا كاعدين آنه وزوجة اخوي وسمعنه وحده من الغجريات (الكاوليات )الي يفترن سابقا بالشوارع يركبن سنون ذهب سنون عاج فصحنه عليها وبعد ان ركبت النه سنون ذهب كالت تردن ادك الجن ؟ فثنينه وافقنه وقامت بخلع ملابسنه ووشمت جسمنه كله والغريب احنه ولا توجعنه وكنا متحملين الالم وراحت الغجريه ودخل اخوي فلكانه مورمين والدم يخر من جسمنه فتعجب وكال :ها ولجن شمالجن ياهو سوه بيجن هيج فسولفنه وكلناله اجت الغجريه ودكينه فماكان منه الا انه لزم صخريه عنده و وكتلنه كتله معدله على الي سويناه بارواحنه وبقى هذا النقش يذكرنه بذيج الكتله.
