* عطا السعيدي
عليّ مرن ليالي ولا ليالي أيوب
أنده بالصبر والصبر يعصيني
شنهو العطلك ماجيت گبل اليوم
يا خيــط الشفاگ وكحلت عيني
أحس چني بضياع وكلي ما موجود
أنشد من عليّ ويگول ها ويني
أنه روح وجسم متعوب حد الآخ
لمني أبين اديك بلطف باريني
جحيل أزرگ أيامي وللعظم نزال
لا تبخل عليَّ بالدفـو دفيـني
انه دمعة يتيم و مالگت شراي
خل أغفه أعلى صدرك ليك دنيني
انه عود أصفري ومن كل ورگ عريان
لمني من الشتات وبيك غطيني
عَضنّي السنين ونابهن مازال
يكفيك المشاهد عن نياشيني
انه منهن بري ويوسف كلاه الذيب
لكن وين طيب الذات يـبريـني
گماش أبيض تراني ولون ما مخلوط
غير الوكت دوني و خلط تلويني
