* إيهاب المالكي
بعد صوتك صدى يهز الحياطين
وخيالك بعده واكف عالمنصة
وعله شفافك قصيدة تغازل الموت
شلون الموت ماينطيك فرصة
اتصيح ابصوت وارض والحم الحيل
واكض فراكك وينكسر نصه
والم اصواتك هنا صوت وهنا
صوت ايعتني حيل وصوت ينصه
وحرت قصة حياتك تبتدي منين
وانته بكل قصيدة اتصير قصة
يعصه التنتجي عليهه المحطات
عليمن تنتجي من اتريد عصه
يالمسافر غفل لا تكطع ويانه
تعودنه عليك شلون تنسانه
كلنالك وداعا عالشفايف اي
بس صبت انهار دموع جوانه
ودعينالك تحن وترجعلنه اردود
بس هالمرة ندري تطول فركانه
ومشيت لوحدك صح بس وره التابوت
راحت للكبر وياك ذكرانه
وكفنه اشلاء يمك من بقايا حروف
بيت انطك عموده وطاحت اركانه
يفارس مهرتك ردت بلا خيال
شجرى والمهر منك يفلت عنانه
ويسفان القوافي اشاخرك ماجيت
قوافيك اسطول يريد سفانه
وكعدنك مناطرينك علراك تعود
خل وكت الغروب يشوف خلانه
تعال اعله المنصة ابيات ودن ليك
ذمة ايكولن ارجع حتى تقرانه
ويشاتل جم قصيدة نخل عطشن شوك
كالن خل يرد الطش بستانه
او فرسانك قوافي وتحت امرك دوم
اشلون الملك يمشي بغير فرسانه
الموتى تلكتلك في مهرجان الموت
ماعدهم بيارغ شالوا جفانه
الماتوا بالمفخخ رادوا ايسمعون
منك اعله الطاح وذبحته اخوانه
وقريتلهم قصايد بالعراقي شلون
لمن ينكطع بالسيف شريانه
وكتلهم النار شكد كلت بالناس
ونعرفه الوكع من عطر دخانه
قريتلهم لحد مابجت ليك كبور
غيرة وحشمت للوطن موتانه
يبو الغيرة بعدنه اناطر تمر طيف
بينه وماتخلي عيون سهرانه
وصدك فرسان كلنه بس بلاك انصير
مثل الردت من الحرب خسرانة
