* حسين جهيد الحافظ

عشگناكم عشگ بدوي 

يضحي اِبروحه من يعشگ 

وعلى طاري المحب روحه 

تفيض وبالمحنة اِتطگ 

يلن بيه الوفة سوله  

ومن طبع الوفي يصدگ 

ومن طبع اليريد الخير 

لازم بالدرب يسبگ 

واِحنه اِنريد نسبگم 

–  ولو بالموت –

نرضه وبالطبول اِندگ

يشعره اِبشارب الطيبين

غيره والوفة تدفگ

مته اِنشوف اِبسمه العشرة

اِهلال العيد يمكم هل

ومته اِترد السوالف ذيچ

ويرد ذاك الحجي الأول

ومته الحنة

ترد الچف الِمعرسين

وجفن الشوگ يتكحل

واِنردد أغاني الحب

شوگ اِبشوگ نتأمل

يحلوين الوكت 

من غير جيتكم

ظلام وليل  لو چلچل

گمر واِنجوم جيتكم

تطش والليل يتبدل

نهار وكل حزن بالروح

فرحة اِبفرحة يتحول

ويرد بيرغ محبتنه

محنة وبالوفة يخفگ

وأزامط بيه شمس الكون

خلهه اِتغيب لو تشرگ

يخصهه اِتغيب 

……. لو تشرگگگ

آذار – 1995