* كامل الركابي
ياسفر
گلب امي نجمة
ضَّوت الليل الطويل
ياسفر
ندمه ابتعدنه
وظل جرح بينه الرحيل
ياسفر
گمرة وطنّه الغالي تبعد
والبيوت ابغير اهلنه
اشلون تسعد ؟
نهر وشراعك دليل
ونجمة
گلب امي الحزين
ضوَّت الليل الطويل
ياسفر
گلب امي شجرة
يغفه عد فيها الحمام
وبيت من الطيب چفها
وكل اغانيها سلام
بيها من الوحشة
دمعة
والدمع بالسهر
شمعة
تضوي ياعين التنام ؟
وشجرة
گلب امي الحنين
يغفه عد فيها الحمام
ياسفر
گلب امي نهرين
وشموس
چانت ابطيبة نفسها
تحلم الروحي ابعروس
تضوي كل البيت
فرحه
وگلبي المالوم جرحه
ابظِل محبتها يبوس
الورد
بشفاف العروس
ياسفر
گلب امي مثلك هم سفر
بس بالحنين
انت من تزعل..مسافة
وهيَّ من تزعل ..تلين
ربي..خلها ابعافية
شمس حلوة وصافية
وأشجار تين
واطرد الشر
والمرض عنها
ابورود الياسمين
ياسفر
وجه امي أطيَّب
من وجه
أطيَّب حبيب
اتغيب شمس الله
وگلبها
إشموس
ماتفعل تغيب
أدري بيها امجرّحة
وأدري بيها اهموم
ممتلية عذاب ومستحه
ياسفر
لاچن خذتني
الهجرة لبعيد , السنين
لسه تذكر
بوسة
من تذكرها روحي
ابغربة
يخنگني الحنين
ياسفر
ماتعرف اشموسي
محطات وحدود
باچر
اتصحِّي سمانه
وگمر
عالبصرة نعود
انغني كل احلامنه
البيها طيب ايامنه
وطيب الورود
انبوس طبگتنه ونهرها
وتنكسر كل القيود
ياسفر
گلب امي وهوَّس
گلي هم گالت خذوه
يمّه
خافن عالنهر
ميِّت لگوه
لو انذال الشارع
اتعدَّوا عليه وعذِّبوه
لومثل ماگلي مرة
من اعلى طابق
عامل ابظلمه رموه
خايفة
وداعه حنيني
وشيبة الراس
العلى ارباته ضِّوت
ياسفر لـ امي سلام
گلها وعيون
اللي عالذِّل ماغفت
إبنچ الآخر محطة
شمس سمره
وماطفت !
