* نوال جويد
اهل الجنوب بصورة عامة يرغبون بكثرة العيال ويعتبرونه مفخرة وهيبة تضاف للرجل فتجد الرجل الي يكون قليل البزر يلجأ للزواج من امرأة اخرى حتى يكون عنده من الاولاد مايفرح قلبه ويفتخر بهم ..لانهم يعتبرون الكثرة عزوه وسند لهم وكذلك طبيعة الحياة التي يعيشوها تحتاج لليد العاملة ..واكيد لايوجد احسن من الاولاد ليعينوا اباءهم في الزرع والحصاد والرعي وكل الاشغال التي يمتهنها الاباء ..
وقد حوى موروثنا الكثير من الابيات الشعرية التي تغنت بكثرة الابناء ..فهذه احد الجدات تقول
حلاة البزر خمسة وعشرين
خمسة يگعدون بدوواين
وخمسة يحيون المجبلين
وخمسة يضبون الحزم زين
وخمسة يودوني لابو حسين
وخمسة يطلعون من گلبي الونين
***
وهنال الكثير من الگولات والنعاوي للامهات الي تشيد بكثرة الاولاد والافتخار بهم ومنها بعض الي يقال
تمنيت بزرك ماي جاري .
وترسوا عليه يازين داري .
واشجيلهم ضيمي ومراري
***
الوحيد طردوه اربعة .
وجابوه طرد للمشرعة .
لو يمه اخيه يمنعه
***
رحم الله والديها الجابت الخمسة.
يحيون الكلب لو كعدوا بجلسة .
ورحم الله عليها الجابت اربعة .
يحيون الكلب لو كعدوا بربعه .
ونعله عليج يالجبتيلج وحيد .
شنهو يكول لو جته الهواديد
ويامحله الثلاثة من يهدون .
واحد وره الثاني يطلعون .
الوحيد يفرح باليحجزون
***
واكيد الي يمتلك اولاد كثر يحجي من مركز قوة وزود فقالو عنه …
يحجي ابو زلم ويهز بذرعانه .
يحجي وعيب يتگنطر على السانه ..
الماعده زلم ضل خايف وحيران ..
يتحسر عليها گعدت الديوان
******
اما المرأة التي قليلة الانجاب تكون مكانتها وقدرها اقل من غيرها وقد قالوا فيها …
كون يصير بطن امك مرج بيها .
تره الجابت المفرد مانحاجيها.
كون يصيربطن امك اصخونه .
تره الواجب تضم للضيج عونه
كون يصير بطن امك سرادي .
تره كونك تظم للضيج داعي .
ولم يقتصر الامر على طلب الاولاد ..فحتى البنات لهن نصيب من حب الاهل والامهات خاصة .ويتمنن كثرتهن ..فها هي احداهن تقول
تمنيت عدي تلاث بنات .
وحدة تدك الثبات
وحدة تسويلي ثوابات .
وحدة تبجي الكاعدات
واخيرا من اكبر النعم التي ينعم بها الله علينا هي بر الابناء بآبائهم فلاخير بالذرية الطالحة التي تتعب الام والاب وكثرتها وبارك الله بشخص واحد ممكن ان يكون خير خلف للاباء ويجازي تعبهم.
