* علي عبود الشمري

كلبك نشف مابيه بعد نكطة التحن 

وعيوني التهواك ذبله الحزن 

وسنين هجرك تحصد بروض الوجن 

وانته بعذابي تعيش وتكحل الجفن 

بس انه احن ..بس انه اون 

بس انه اغط بضيمك ودوم امتحن 

وك انه ياماتهت بهواك وماكتلك تهت

وك انه مثل الطير مصيوب وطحت 

حسبالي اضوكك طيب ..اطيب ماضكت 

وانته الخنت ..وانته البعت وانته الردت 

اتحنه بدموع الجفه واكثر ردت 

اهار وسبح بالالم وانته الالم 

ومثل اليطيح بضيم من زلة جدم 

مكسور ماينفع جبر والروح ذوبهه الصبر 

وبجلمة الشمات دلالي انلجم 

مجروح جبدي بصدك وبيه السهم 

ينكط ندم ..يلهب ندم ، يصرخ ندم 

وبسيفك المسموم دلالي انكسم 

وك انه مثلك ماشفت بين البشر 

تبيع وتشاري بهواك ابكل فخر 

حسبالي عندك طيب يغمرني ابمطر 

حسبالي حبك ينمو ونضوك الثمر 

حسبالي تجلي ابشوكك ادموع الكدر 

مسموح لوكتلك تبت ..

مسموح لوعنك ملت 

مسموح لو كلبي اليحن 

بالحب كفر 

بالحب كفر