* حيدر الاديب
معبعب كل كتر منه جرح الناس
أويه اوذان الصبح … رزة الباب تصيح
مو مسؤول كابع بالحجر محروس
صوت الباب … اسمه القفل يندله
الصبح جاب الشمس لجدام ديوان
وركب جدمه حچي الضويات
بالظلمة الحچي ميت اوبي خله
يوميه بمدينة … ويبچي حچي الناس
ومرات بفرح ترگص ميادينه
لاسفرة محامي ونعرف الوكفات
ولا ربح الحچي…. ويترس جيوب العوز
جيبه مرافك القرضات ..
ماطبه ربح … بس عرگ گصة عوز
مرة … حطوه بوظيفة حارس جنينة
فرح كل الزرع سده … على جتف الشمس الوان
جي ديوان يزرع … جرحه يزكي الماي
ما مولود من طلبه نگيصة زود
الرزق جابه مطر عالبيد
حدر صاية ابوه … ربته اچفوف الليل
وشفاف السوالف … اخذها من صدر ديوان
ويه اهله … ما معروف منهو اليرسم الدنيه
خلط بيهم الطيبة … الينعرف بالگول
هوه اسمه سفينة … وهمه عالي شراع
والماي الوطن … والغمگ وسط الناس
مافد يوم … مد ايده وعزل ماعون
يكفر بالمنايه التعزل ايد الخير
ومن تمشي العگل …. حروف من عنده
يتغازل الحل البيه خلاف الناس
وي ضحكة غزل لعيون مرتدة
وبهاي النتيجة يموت حچي الغث
وعيون المصافح ضحكت الكل جف
