*قاسم هليل الحسني

اثبت يا وطن چلب ولو بالريح

تره غيمة اوتعدي وباچر اتشوف

واصبر يا وطن رغم الولوك انذال

لبسوا من حرير وثوبك الصوف

واصمد يا وطن لا تغرگ ابساع

رغم جرفك بعيد انريدك اتطوف

اولادك يا وطن كلهه حسافة اتموت

وعدوانك تغني.. اتحني الاچفوف

انهض يا وطن گوم ارفس الگاع

ودوس اعله المنايا وكسرّ الخوف

واصعد على الصعاب اوزامط الكون

وخل غيرة هلك نجمة اعله الاچتوف

ادريبك جريح وجرحك اسنين

اوصح ليلك طويل ويصعب الشوف

لچن باچر شمس ويغادر الليل

ويطيح الحرامي.. وكلشي مكشوف

باچر يا وطن نتحزم احزام

ونصفلك زلم گدامك اصفوف

بسك يا وطن ذل او سكوت وآه

ذب ثوب المشگگ.. ما يفيده الروف

والبس ثوب عزّك وانكت الضيم

تره اتراب المذلة امغطي الارفوف

جبل انته وحسافة اتدنگ الراس

وهضيمة ايحز رگبتك ماي الاجروف

گبل دارك أبية وتكرم الضيف

چنت كعبة وتجيك الوادم اطوف

گبل چانت الناس ابسدك اتلوذ

وچفك بـ(المكاون) صيته معروف

گبل من تحچي.. تسكت كل الحلوگ

گبل مشيك عدل ما تعرف اتلوف

گبل گاعك خضار او خيرك اشكال

شجاك، شغيرك، يا وطن هيهات

گمت اتمد أديك ابوجه الضيوف

شجاك وگمت تختل ساعة الضيج

يالطبعك يخوّف.. ما يعرف الخوف

ناذرلك نذر.. يا موطن الخير

من توگف اجيك ابساع ملهوف

اسويلك عرس وافرشلك الگاع

واخلي النخل هوه يصير زافوف

واخلي النخل هوه يصير زافوف