* راسم الخطاط

چي گلك انت ضوه

عاجبني ارسمك شمع

بس انت من تشتعل أكره أشوف الدمع

طالب ترك مدرسة

بلكن يعيّش هله

شبعن جفوفه بجي وماعرف شنهو الشبع

بس راح ارسمك ورد

چي خطوتك من عطر

السبورة كلش علت

والطفل عايز شبر

الطبشور گبله بجه جي أخذ هوَّ صفر

حاير شرسمك بعد

وانته ارسمتني عُمر

ارجف قميصي انمزگ

بس اجوي گلبي جمر

مركب سنيني ورق

وبروحي ارسمك نهر

حتى اغرگ بخطوتك

وانت بحياتي سفر

قريتك وآني طفل

من گبل ميطب حسن للمدرسة وي ريم

ومن گبل جان العشك

ياعمي مو تحريم

اي من گبل من كَبل

من زمن دار ودور

من چان عدنه وطن والوطن ما مهجور

من چانت أمي تخبز وتنورهه من طين

ومن چان جعب الشهر يزود عدهه طحين

گلي شأرسمك بعد؟؟؟

وانت انزلت بالنفس

وصعدت بيه من صعد