*طه التميمي
عمري ازغر من حبيبي
اسنين محسوبة اثنعش
چان اول حُب إليّه
وگلبي لجدامه انفرش
چان اكبر من خيالي
وچنت خايف ادنه منه
هيبته اتخورس سؤالي
ومن يجاوب گلبي عنه
شفته نور ابنص معامل
يضوي عفّه وعالي صرحه
وابمزارعنه لگيته عزم منجل
يحصد من الليل صبحه
صار هاجس وج ضميري
اشما صفت دنيانه وكحه
ولني عاشگ درب جدمه
لاني اكتمه ولاني اصرحه
وبحكم كل عمري عامل
چان هدمي اولام هدمه
وترس عيني اينام رسمه
ومن يسألوني اعله حبي
بالشعر يسبجني اسمه
هذا وضعي وهذا حالي
اشما مشت بينه الليالي
وانته يالتسألني عمري
عمري سبع اعقود عدّه
وحبي يكبر عشگه عذري
ولني چلمه ابسجل عنده
ورغم عكة مرض بيّه
ورغم كل الصار اليه
جيت اغني ابعيني دمعه
من الفرح متلمني وسعه
الگيت حبي اهلال ديرة
ويمه كل الناس فزعة
ورد … وبخور …او صواني
وعلگتله اثنين وثمانين شمعة
هذا حبي وعشگه عذري
وياهو مثلي ايهيم طبعه
وياهو ينسه الدنيه كلهه
من يصير ابين ربعه
للسلام وللمحبه انغني غنوه
وللوطن كل احنه درعه
وللوطن كل احنه درعه
