* إبراهيم قاسم

اريد اعلن حداد وللعشك ماعود 

واريد انساك وانسه البينك وبيني 

وشك دفتر غرامك خاطر انه انساك 

ودير الوجه عنك من تلاكيني 

ماريدك بعد لو انت روحي اتصير 

وماريدك لون من موت تحييني

 ملح بعيوني احطن ونسه حتى النوم 

اخافن بالمنام طيوفك تجييني

 اذا شافتك عيني وفرحت بملكاك 

والله اتبره منهه وهاي موعيني

 واذا صافحك جفي بحجة الخملان 

اكص اثنين اديه يساري ويميني 

واذا كالولي حبك يسري بالشريان 

ثق بالله اكطع كل شراييني 

واذا صاير شمس انه ابقه دوم بليل 

وما ريد الضوه وبالظلمة خليني

تذكرمن لكيتك والعطش واليك 

وكلتلي امعود اترجاك روييني 

عصرت اجفون عيني وشلييت دموع 

وشربتك بديه وانت تدرييني

 ومن مرني العطش صرت انت جربة ماي 

كصدتك معتني ومديت جفيني 

وانته بكل وكاحة وكل صلافة عين 

درت بجفوفي سم وردت تنهيني

 تذب نفطك عليه وانه بيه النار

 وتتحمه اعله ناري و ماتطفيني 

وصرت محبس بديك وكمت بيه تسوم

 ساعة تبيع بيه وساعة تشريني 

اظل خصمك وفضحك حتى من اتموت 

على كبرك أخطـن بايك اسنيني