* كريم راضى العمارى
اتعبت يا ليل
كلي اشوكت انا اوياك
ننزع ثوبنا الاسود
اتعبت يا ليل
او دمعاتي نهر طاحن
على الخدين
او صارن للجفن مرود
مو كافي حزن يا ليل
مو كافي قتل يا ليل
مو كافي وطن مرت عليه اسنين
يفرهد
او يا حاكم يجي
ايجيب العشيرة اوياه
او كل واحد زعيم اوحد
اتعبت يا ليل
او مو سهلة جرح
بالنار يتضمد
اتعبت يا ليل
غطيت ابعباتك قاتل اولادي
خالد والبطل سرمد
بس يبقى العراق واهله الطيبين
ابيض يرفض الاسود
