* كاظم غيلان
الساعة دكت
أدري دكت
خلني نايم.. دنيه ليل
وجية الغبشة بعيدة اهواي
درب الغبشة موحش
وآنه أدري الليل يطوي ابليل
والطيف اشتهاني
وكمرة زتت كمرة
والفارس لكاني
ابعتبة الحرية واكف
بيرغ أحمر شايل ابجفي
ونشيد البارحة ابروحي حداني
الساعة دكت
: لاتفززني
بعدني أحلم تراني
شفت عرس القاسم
ونذر أمي
والياس .. وصواني
وأسمع ابروحي صهيل اخيول فرسان
وجناجيل… وتراجي
والمعاضد.. والمحابس
والروازين العليهه انذور خضره
العمر سفرة
العتبة حضرة
انرشت ابماي النذر
آه.. النذر
آه الجسر
عابرلك..
وصوبينك اشتعلن اعيون
ايجدحن
ويضون على الوان الخراب
عالمآذن.. عالكنائس
عالتكايا
وعالنثايه الطالعات امن المدارس
على تنورات
بيهه الشذري يضوي
وعالغياب..
آه.. ياصوب الغياب
هاكثر فرهدني حزنك
هاكثر عذبني هجرك
هاكثر…
جم هاكثر
ياهاكثر بعدك شباب
الساعة دكت
: أدري دكت
خلني حالم
شفت حاكم.. بيده تفكة امزنجرة
وشاجورهه ايصيح عليهه
وشفت وردة
ومايهه امغبش عليهه
وشفت نثيه.. اشلون نثيه
الدنيه طاحت بين اديهه
وشفت.. لا.. ماشفت
مثل الشفته
ويه الحرب.. ويه السلب.. ويه النهب
كبل الباب ذاك
الرزه من زعلت عليه
سولف وغاب
… غاب
