* ريسان الخزعلي

( 1 )

.. لمّن فتت..

كلشي إوياك راد إيفوت

فز إمن القميص الورد..،

وإتخطاك عشر إبيوت.

ولا عِثرت إعيونك..،

تلگط الطايح إعله إهدومك إبحمره توت..

هذا آخر جرح..،

ليش اسود..،

إبخصر إيدك تشدّه إعله البياض إبتوت..؟!

إنتَ التسمع إمن النده حس صبّيرة وكت الموت

ولا چنّك تريد إتشوف..،

حزني إشلون عالي الصوت..

مثل حزن الگصب..،

يتسولف إويه الماي بالبسكوت…

(2)

.. ولو..

ولو مامش نوم بالجنّه

چان السمه..،

إيريد إينام بالنفنوف من سولفوا عالجنّة.

وإنتَ المو مثل طرواك ما ينلگي بالصفنة

اشوفك..

گبل..

وجهي..

الصبح..،

وامرايتي إتچذب..،

إنتَ إبعيد ما تنلاح..،

بس من شوفتك بالنوم ما جزنه.

….،

چذب من گال نوم الجنّة..، موجنّة…

( 3 )

.. كل ما بيك..

كل ما بيك من لذه..،

مثل الحلم..

ما ينجاس..، بس إيجيس.

إنتَ إبلا وجه..،

وإمرايتك /نرسيس/.!*

*نرسيس/.. شاب جميل، تقول الأسطورة الاغريقية أنه افتتن بجمال صورته في الماء، فذوى جسده وتحوّل الى نرجسة.