* كاظم غيلان

الماي راكد..

والنهر خلكه طويل اهواي 

جرفين المناحه اتناطر الخطوات 

ياثكلك صبر ايوب 

ياحزنك عراقي امن الزمان الفات 

مرات…

النهر يصفن شجاله الماي 

لاصوبيني كسرن خاطره 

ولاناس..

وهواس النهر وهواس

ياماي انتخيتك تنكل الخطوة 

البخت ماظن بعد ينداس 

،،،

الماي شارد..

والنهر خلكه كصير 

الشمس من اتغيب 

يتباهه الأمير

وجرف ينشد جرف 

عن حسبة الماي 

وليش شارد.. وين نيته 

الكتب للوادم وصيته

الصاح بالنايم عله اكتار الحصير 

الماي شارد وين 

والدنيه ربابة كاولي وبيد الوزير؟

،،،

الماي شاهد.. عن زمان الطف 

عله الصار 

وبله الدنيه بله 

الماي شاهد جزع من حاله ونشدني

: الدنيه هاي الدنيه كلهه؟

جاشجاهه.. وكلهه صارت كربله؟

ك. غيلان 

7-1-2017 – العمارة