عمر من خشب
عُمر.. من خشب
دافنيّ العشگ.. بتراب هجرك
كل يوم.. ادگ مسمار لفراگك
صدّت العتبة وطلع صبار بثيابي
عُمر.. ماضاگ منك شي
فرهدوك محاضن مخابيل
واحنه بطرگ موعد
عود اسمنه نحب..
عساها ببخت اليكرهون
مثل عيد الله الچبير..
تمر على دروب الشماتة
وآنه شايغ من حلاتك
لا لي حوبة ولا لي خاطر
ضاگت دروبي..
وتعب شباچ بيتي من المناطر
تگطر صواني عسل
وك وآنه حنظل حصتي؟
حنظل يالحبيب جزاتي؟
الله يسامحك..
كلشي بهواك يهون!
****
يا بحر
يا بحر..
جاي اصلي لك وصوم
جاي..
من غبرة حروب وظلم حكام
جاي احط راسي اعله صدرك
واغفه ساعة من الهموم
يا بحر..
جاي اصلي بحضرتك
واعلگ لموجك شمع
جاي.. جايبلك من أهلي علامة
حفنة تراب ودمع
جاي وثيابي تگطر دم
گصه الحجاج بينا يا بحر
وانتَ عطاب ونبع
يا بحر..
جاي أفرش همومي اعله شاطيك ونام
جاي اطش حزني عله رملك واشتكيلك
جاي اشم تراب جدمك..
يالبيك ريحة من الإمام
****
سحابة
من زمان أنطر سحابة وما إجت
غيمة. ما مرّت على أحد من گبل
غيمة من آخر سما..
وآخر حزن
غيمة محملة دموع وبواچي
من زمان انطرها لاچن
… ما إجت
شگد بچت روحي عليها
شگد عليها سولف الرمان
والتينه حچت؟
غيمة الله
عشعش الصبار بجروحي ونبت
وانتِ من آخر سما
وآخر حزن
وآخر عمر
لْيمته اتاني
من سما اجروحي المطر؟
****
وين أودّيك؟
ما أعددت نفسي لهذا أبداً
وين أودّيك؟
چنها ليلة عيد جيتك..
چنها صبحية عرايس،
رنة هاون من بعيد
تلوهني العشگ.. وتْلْوهت بيك
چا وين أودّيك؟
وين أوديك ومسافة ليل عمري
وانته ألف نهار يمرح بيك
فريضة صوم عشگك
وآنه صايم
چا يمته اعيِّد بيك؟
وين أودّيك..
يالهمزة وصل خصرك
يالجمّارنا يغار ويباريك
اجيت بغفلة الأيام
وين الگه عمر وسنين تفديك
چا وين اودّيك؟
…وين أودّيك..
وانته غيمة مستحه وشيمة احباب
وآنه خشبة باب
الله..
الله يا حيرتي..
شگد بيها روحي حزن وشگد فرح بيك
چا وين اودّيك؟
وين اودّيك، وآنه شباچ وحچي
وانته خواف وتحاسب عَالكلام
اطمئن ما راح أگل للناس احبك
بس راح أگلهم
آنه احبك والإمام!
****
عطر الغايب
تركت عندك كل ما يدل عليّ..
بما في ذلك ما
يدل عليك!
عطرك اسمك،
خصرك العنوان والتيجان صرتك
جنة بخور وشمع وآنه درويش بحضرتك
حسنك ؟
حسنك يتلوه صلاتي ونومي حيره
مرايه اشوفن بيك عمري
مدري انته الچنت اشوفك
مدري هذياني اليرسمك؟
مراية حزنك
بيك لو بيه الألم؟
سيفي لو سيفك طعنّي
وسال دمك؟
مرسوم من طوفان عمري
شمحي منك؟
شرسم بفضة عذابي ولوح عمري
حجايه منك!
شأكتب بدفتر غيابك ؟
طولك ؟
طولك مثاوب مستحه …وچذاب نومك
من اجيسك
تنفرط حبات روحي عله الچراچف
شلون ألم روحي وألمك؟
شلون بيه.. شلون بيك؟
شلون افرفط روحي يمّك
وحبه حبه من اردْ اضمك؟
زيبگ مراية لهاتك
حاضر وغايب واشمك
مرايه حزنك واشتكيلك
وانته منك تشتكيني
ياهو بينه اليشكي منك؟
