* محمود ابو كيان
من توالفني اشبعنك حنان
ومن تعاديني اشبعنك جرح
من تجيني بالعطش تلگاني ماي
آنه حتى حچايتي تنگط ملح
نيتي كلش صافية.. شتعرف اخون؟
ودوم ما دور زعل بس الصلح
روح تلگاني نده مغطي الورود
وراح تلگاني غزل عند الفلح
آنه هذا بكيفك انته ومشتهاك
بكل حزن تلگاني گاعدلك فرح
تريد تلويني.. صلب كلش اصير
تريد تطعني تلاگيني رمح
شمعة احرگ عمري لو مرلك ظلام
ومن تماشيني تمل من العشگ
كون تهواني أريدك بيه روح
وكون تبقى وياي ابد ما نفترگ
تريد تچويني بهجر تلگاني نار
منين ما جدمك يزل هم تحترگ
شوكت ما تشتاگلي تلگاني ناي
وتسمع الحان الغزل باجمل عزف
ومن تجيني بخنگتك تشتم هواي
راح تلگاتي نسيم اشگد ترف
العشگ بين الناس بيه حوبه وچبير
لا.. امام وداعتك بيه ينحلف
الخان ولفه وخله طعنات بكفاه
حاله حال الكاتل وما يختلف
الچنت شايلهم عمر حازوني بيش
خلو ابگلبي جرح كلش كلف
والطعني ابظهري ضنيته غريب
ودورت طعناتهم طلعت عرف
وآنه اريدك كون تهواني بضمير..
أتداوي جرحي وبيدك تشد النزف
