* مظفر النواب
روحي ولا تكَلها : شبيج
وانت الماي
مكَطوعة مثل خيط السمج روحي
حلاوة ليل محروكَة حرك روحي
حمرية كَصب مهزومة بالفالة ولك روحي
وعتبها هواي ما يخلص عتب روحي ….
لا مرّيت … لانشديت …. لا حنيت
وكَالولي عليك هواي
وعودان العمر كلهن كِضن ويّاك
يا ثلج الي ما وجيت
تعال بحلم … أحسبها إلك جيّه واكَولن جيت
يالعيناك فحل الكطا الكاطع جول
يالشوفتك شبّاج للقاسم … ودخول السنة من الكَاك
يا فيّ النبع واطعم …. عطش صبّير ولا فركاك
يالرهميت … يا مفتاح فضة ولا رهم غيرك عليّ مفتاح
أجرتلك مخدتي وانطر الشبّاج اليجيبك
وانت عرس الليل والقدّاح
يا هلبت تجي ونرتاح ؟؟
واكعدلك على فراش العرس
طركَــ المسج والنوم
عمر واتعده التلاثين … لا يفلان
عمر واتعدّه واتعديت
ولا نوبة عذر ودّيت
وانه والمسج والليل وانت النوم
واغمّض عود اجيسك يا ترف تاخذني زخة لوم
واكَلك : ليش وازيت العمر يفلان
يفلان العمر … يشكَر ولك يفلان
شيوكف العمر يفلان وهجرك دوم
كل ليلة اشوفك بالحلم عريس
اكَول اليوم
يجيبه …. خلص كَلبي واكَول اليوم
ولا التفتيت … ولا وعديت … ولا استخطيت
ولا طارش جذب ودّيت
ولا مرّة شلت عينك تعرف البيت
وكَالولي عليك هواي …. ورحت ابراي وجيت ابراي
حسبالي سنة وسنتين وتلاثة
واشوفك ذاك البكَلبي … واضوكَك ماي
حسبالي اشوفك ابن اوادم …. يا شكَلك … موش اشوفك هاي
ولا حسّيت ……. ولا استخطيت
ولا جيت اعله بالي
تبيع بيّه وتشتري بالسوكَــ
لا ما جيت
وكَالولي عليك هواي ……. كَالولي ……
كَالولي …….
كَالولي
