* حسين جهيد الحافظ
من هيبة الفالة
او شيمة المگوار
من هلهولة احميده
إو هوسة أم جوار
(يا موت ااطحن وآنه الهيلك)
هبت للوطن ثوار
زلمنه أحرار
زلم رگصت
على أچتاف المناية إبشوگ
علت فوگ فوگ الفوگ
شگت بالحقيقة أحلوگ
يا بو احلوگ
تباهه الموت بيهم
والتباهي ايلوگ
أعز شذرة
أترف بسملة او عوذة
حضنهم بالمحنة
او صار الهه الطوگ
زلم والموت
شني الموت
عدهه الموت غناوه
على ااچتافه!!
تطش ارواح تتغاوه
عليه تتمزد إبكل زود
أوياه إبشوگ تتلاوه
يهوس خال لبن اخته
إعله صوته النجم تتهاوه
(چن ما هزيتي إولوليتي)
ترد الوالده إبكل زود
تترهدن رهاوه
(هزيت او لوليت الهذا)
أو ترد النوب تتغاوه
(ابني المضغته البارود)
رضعته الشجاعة ابزود
چانت لعبته تفگه
مو چعبه اللعب بيهه
رضع منهه كبر واتعود اعليهه
ما مفطوم عالممات
(مفطوم اعله سرگيهه)
هد إبفالته اعله الطوب
والتاريخ شاهد يروي أخباري
هوس فوگ حلگ الطوب حداري
(الطوب أحسن لو مگواري)
هذا ابني كفو او نعمين
ترف وايلاوي الكلفات
والزينات راعيهه
(غم إللي تجيب اهدان
واتگمطه اعله رجليهه)
ابني الما يهاب الموت
نخاوة عمامه او للمجد عنوان
سفينة للمحبة
ثورة العشرين
صارت والولد سفان
لهسه ابمتن الاستعمار
ظلت فالته نيشان
تذكره بالرميثة
ابثورة العشرين
بالمگوار بالفالة إبرواياهه
ابهوسات النشامه الكتبت التاريخ
والتاربخ يتباهه
(رد فالتنه اعتازيناهه)
