* وجدان النقيب
تهت والمستحه بروحي
أدور وين ما بيه بگايا ارماد
واتوسد على جروحي
وأفزع چلمة التنگال
توگفلي بوجه نوحي
وأداري الآه، هلبت من عيون الناس اداريني
والاگيني وحيدة هم
وأختل بيني وبيني
شنو ذنبي وحرمني الضيم عشريني
شنو ذنبي وحرمني المسچ والحنة
وعلى جروحي يتچيني
أعيش المن؟
وأموت بـ ليش؟
آنه اصلاً ضمير الناس موتني ميحييني
وآنه بلا ظفيره وشوگ يشعل ظلمة سنيني
وآنه بلايه غير الـ(الهم) يوميلي يواسيني
وتهت ما بيني وبيني
اتوچه اعله طاري الشوگ من اتعب واسليني
واشهگني نِفس محتام ما مش رية تشريني
واتخايل الجنة بعين خنگت كل ضحك بيه
واتوچه اعله آهي النوب بلكي تعيني شويه
واتمايز عيون الناس تاخذ مني كل حيلي
اواسي بروحي اگول تهون واتجرع بخت ليلي
واغني الآه تعثر كل محطاتي بغنه الويلي
واعاتبني اعله كل ونة تواسيني بسواديني
يمن بالروح مطبوعات ناغـَني واغنيني
آنه من طين موش حجار متعوب وترف طيني
غـَننني اريد ابچي فرح مبيوگ من عيني
