للشاعر المرحوم عبد الواحد معله
من ايدي وياذنب تجنيه الأيام
اشيجني السجه العوسج والخرانيب
وانه ولا سواي ابهاي ينلام
ابسبب ما اثرت بيه التجاريب
والي صابني حيل وياي
مستاهل بعد أكثر أو أكثر
جي لني ما حسبت احساب دنياي
والي صابني لا تظن أثر
انه احركت روحي ابشمعة اصباي
اضوي لعد غيري خاف يعثر
ظنيت الفضل بالفضل ينسام
وبالطيب يتجازى اليعمل الطيب
اثاريني كصير الراي وهام
اريد من الـ………. تعرف العيب
جان الواجب بأول المهداد
اشوفه اكحيل لو بس المحاجيل
واعود اعليه اراهن لو شفت جاد
ابعزمه وكام يركض اول الخيل
كلت من عثر هذي عثرة اجياد
غرتني معارف تغر واشليل
اتمايز شكل وانظر الهندام
لجن يا حيفة البالمراهنه ايخيب
الكد بي مايطلع لجدام
ابمجانه وفاتته حتى المغاليب
غير ايكون وحدة اثنين وتصير
عبره واعتبر واصحه الزماني
غير ايكون عندي ايصير تدبير
واخلي هاي ترجيه بذاني
غير ايكون عندي ايصير تفكير
واعي واحذر من إلي جواني
كل هذا وانه ساهي الفكر خام
ابوهم حدار نوب ونوب تغريب
للخطة نكدته امرصص ونام
الجه وصرت مطمع للواعيب
على روحي جنيت ولا توانيت
ولا كعيت روحي وحاسبتها
هل اتشوف بتله الضعن ظليت
عافتني الرفاكه الما عفتها
عود اساع حسيت وتوعيت
عكب ماذرته ابعيني خفتها
ايكول المثل بعد الخير جدام
وراعي الغيب هو اليعلم الغيب
وحك الله ارد احط جويه اعله البهام
جويه تظل تدي الآخر الشيب
ولو جويات كثرة الغدن عالايد
اشمايبرن إلي منهن علامة
يهونن ﻻجن اليكلفني ويجيد
الأشد منهن على روح الملامة
أنه المديت ايدي وخلوا القيد
بيها وجنت اظننهم نشامه
والي جنت اعتقد للقيد فصام
واحن اعليه حنة النيب
جتفني ورماني ابير اعدام
وما يلحك علي شيخ الجلاليب
من ايدي وياذنب تجنيه الأيام
اشيجني السجه العوسج والخرانيب
