* وسام الشويلي
لحظة وداعك موت , وادري الصبر تابوت
كل خطوة من تروح تترك بكلبي جروح …
كبل السفر كلمات , تحجيهن الدمعات
يالغالي يذبحني الهجر وانحسب بالاموات
لو رايد التوديع احسب حياتي تضيع
والدنيه تتحول كبر بغيابك وترويع
اشتكيلك من رحيلك والليالي بلا ضوه
كلبي خايف بي سوالف لا تسافر يا هوه
من تبتعد يحسين ,,, تعطش عليك العين
والدمع ىدم مسفوح , تترك بكلبي جروح .
الماذيني جرح فراك , والفرح مني انباك
يحسين شحجي ويه الكلب لوكال الك مشتاك !
كتله فلا ترتاح والغالي عنك راح
بآثاره كاتب عالدرب بهمك فلا ينزاح
عني تمشي , وضاع كل شي , ومابقه بس الدمع
وبسؤالي , ها يغالي , هم تعود وننجمع ؟؟؟
اتسله بعدك بيش ؟ ودونك جذب ما أعيش !
يا أعز من الروح , تترك بكلبي جروح .
أسأل وأريد أخبار , يا الغالي بيك شصار
يا رحمة الله وجنته , تدري بغيابك نار
عطشانة روحي هواي , وانتظر جيتك ماي
حتة الهوه من لهفته يسأل عليك هواي
دنيه سكتة , وينك انته ؟؟؟ تسأل عليك الشمس .
صوتي يطلع , كافي أرجع , آنه مشتاكة لأمس …
مهضومة أكضي الليل , بالحسرة والياويل
والمهجة من تروح , تترك بكلبي جروح .
لحظة وداعك موت , وادري الصبر تابوت
كل خطوة من تروح تترك بكلبي جروح …
