الشاعر الراحل صاحب الضويري
ياحبيب لو كِلت باجر نشيل
ما تصير بس نكول احنه ولو
جنت احشم كل عمامي اعله الرحيل
وما يهمني الي اجو والما اجوا
(ويا حبيب لو كلت انه زعلان
جنت ازعل عالهوى لو زعلاك
وما يمر بريتي وهذا المكان
البي كبل مشتم هواي اشتم هواك
انت دره وشفتك بكتر الزمان
وكيفت من كلبي بكتاره زرعاك
الدنيا مدري شلون فرشتلي الشليل
وفرهديتك يوم عذالي التهوا
وانه جبت الغانمة وانت الدليل
جورت واهل الهوى ما حصلوا)
من زمان دياركم تشكي الظلام
وهالنثرنه عيونه عليها نجوم
وانت تدري طباعنه طباع الحمام
من يتيه يظل على دياره يحوم
وهالدوت بكتارنه نار الغرام
وما يطفيها وعلي ملك الغيوم
بس رضابك ياترف مثل الجحيل
وكلبي موكد ياحلو بي وكدوا
انه احبن بيك كل ما هو جميل
وما علي بالي حجو والما حجوا
اي وحكَك وانته اغلى من اليمين
وانه بس بغيرك من احلف جذو
انه وانت وماتهمنه العالمين
ان شركَت وان غربت بيها الدروب
وهسه عتني الشوك يمك والحنين
استاحشت جي وحدّي بوكت الغروب
كون يمك جا صحت عندك دخيل
دولبني ايام هجرانك شـسو
وانت تدري بمهجتك صاحب نزيل
خاف غيري بالنزل خويه ادعوا؟
تميزت عن ربعي بيه الطيبات
وظلت دروب الرده لاهل الرده
واليبات على الهضم خله يبات
الغيره مهره وما تظل محددة
دير دوك عنانها على النايبات
وكوهه اسحك عالخطر واتعمده
هاي هيه ولو طحت بيها جتيل
بمشتهاتي لرحتك اصبح لهو
كفه الميزان تنزل بالثكيل
وهيه دنيه ومو شرط بيها العلو
يا شريج العكل خلهم شيحجون
وما علينه بالعرف نفسه نشيط
لو دروا والله كلهم ينتهون
وصاحوا بغربانهم يازي اللقيط
وانه ما اريدك تسد عني الديون
ولا اريدك لو كرب موتي محيط
انه موتك ضايكة وجن سلسبيل
ومن منايا محبتك شارب حسو
وما اذله وداعتك واصبح ذليل
من اشوفن بالنزل غيري ادعوا
عاد احشم كل عمامي اعله الرحيل
وما يهمني الي اجو والما اجوا
