* للشاعر عبد الحسين ابو شبع
تعال اثنينه نبحث .. موضوعك وموضوعي
يو التزم مشروعك .. لوتلتزم مشروعي
***
ابن هذا الوطن إنت حسب ماتدعي وتشهد
وانه ابن الوطـن والناس تعرف والـدي والجــد
وطنا يحتم اعلينا تحمي ثروته والحد
نتعاون بهذا الراي أنه وياك وانت ويـاي
شكلت بيها صحيحة هاي
ولك ميصير آنه احرس وانته بسطحك تعوعـي
***
اول مرحلــة نبحث مااخفي عليك اسرار
هدفنا نصفي تربتنا مــن اذناب الاســتعمار
ذاك الوكت من نصبح صدك من الصميم احـرار
ونبدي بمرحلة تصنيع ومنخلي الاوقات تضيع
ومنخلي الدعاية تشيع
هذا الاخ ديمقراطي وهذا كافر شيوعـي
***
إحنا نريد الاستعمار .. مايدخل التربتــنا
ونحافظ على التربة .. ومكاسب شرف ثورتنا
ومعامل بالبلاد تصير وشغيلتنه تشـوف الخير
وعلى خط مستقيم نسير
ميصير انته متنعم .. وانه مكوّ خ بجوعي
***
انه موحاسد النعمة .. عوافي تأكـل لحالك
يكون اتصير إنساني وتقدر تعب عمالك
تشوف أطفال هالُعمال مثل ماتنظر اطفالك
اطفالك تنعمها وتدرسها وتعلمها
وذيج اطفال تحرمها
جوع وعره شاجمعلك خاف اخطأ بمجموعي
***
عرفنا نحجي عن الحك منلفف اموال الناس
كلنا انريد نتعاون .. كلنا لوطن حراس
مويوم الذي يولوك تحطني بحجيك اعله الراس
ولمن تضبط حزامك تدوس الناس بجدامك
اخذ تجربة من أيامك
ترد لضلوعك الرمية !! لوهدفت بضلوعي
***
أتهمك وحده من اثنين .. لو من الصفير تخاف
يو لاغلب ومغالب .. تلف وتدور موانصاف
يوآلـــة للاستعمار .. ترسم خطط للأحلاف
عليك شيامر السيد .. تكله نعم وتأيد
تره وهمان يعني
لاأطلس ولا سنتو يعكس نهج مطبوعي
***
نصيحة اخذ من عندي .. أنــي اللي إلك انصح
العدو لوربحك دينار … مــن عندك ألف يربح
والتهريج والتشريد.. وجلاب الــذي تنبح
من اعداك ماتحميك لوصـــار الحساب عليك
باجر عمك يجازيك
يكلك جيب يافوخك … واسمع دكة اجموعي
***
لاانت ولاغيرك .. يكدر يصد ها التيار
تقرير المصير يصير حتما ً والشعوب أحرار
فشل عقل القديم الجان يحكمها بحديد ونار
ذاك العقل غيره صار عقل السلم والافكار
عقل السفن والاقمار
عقل الذرة والصاروخ وين أنت يجرقوعي
