*عباس طريم
ايگول المثل , [ لتضيع المشيتين
وانه ضيعت ممشاي گله
حاير , وين ادير ليا جهة العين
واللي ينتخون اليوم قله
صرت مثل العليل .. ابين احين
يون , كلمن يسمعه ايگول خله
ومثل مديون .. ويحاذر من الدين
وخلصهه بعسى تفرج وعله
گصدنه الينحسب من الميامين
ساعة وكال : هذه الضيف وله
وگبل لا نحچي , ونسولف چلمتين
حچيكم گال : بدلوه مو محله
يگولون العرب اهل الدواوين
زرتهم .. ما شفت والله دلة
ولا ديوان وترن الفناجين
ولا شفنه حمد بالضيف هله
ولا نار التنادي اليمر.. حي هين
ولا الوجه الصبوح .. الحلو الطلة
عصاير شفنه , متوزعة ابمواعين
ونسكافيه , وبوزه نوع فله
وزنود الست, مع البقلاوة نوعين
وكيك وكعك , وايگلك تحله
وشفنه الموز , والعرموط , والتين
وتفاح , وعنب . مالي السلة
سألنه وصحنه : جا وين الصواوين
واجانه الصوت .. ذاك الوكت وله
وصاحو بينه .. بويه انتم مجانين
يا صيوان , يا طرگاعة الله!
انتو اهل الكهف .. لو جنتوا بالصين
ما تدرون عن الكل تخله
الزمان الجنه بي هامات عالين
واجانه زمن , خل يغدر ابخله
زمن , بي ما صفوا بعراگنه اثنين
ولا مسؤول بالحكمة تحله
والبيه انتنومس .. زلمة الزين
جفت دنياه .. وعنه الكل تخله
وكرام الناس .. تحت الگاع ميتين
واهل البخت .. گعدوا فوگ تله
والتنخاه من الكوم الميامين
نخوتك وسط عينه اتصير سله
الكرام , الله خلقهم للمعسرين
ايادي اتبيض اوجوه ومظلة
حسافة اهل البخل صاروا جثيرين
سمر وطوال .. ميسدون خله
البخل شفناه , مو بالسمع .. بالعين
وامام النظر للمگبل تجله
الكرام : الچاي صار الهم عناوين
ماي وشكر , حته الضيف مله
وكل ساعة المعزب صاح : ياسين
ولك صب چاي , حطله شكر حله
واذا صبلك بعد عيني استكانين
معناهه يقدم الكرم گله
افرح للكريم ..النشمي , والزين
وحاذر من بخيل – ن لو توله
الكرم مثل الشجر , من يصف صفين
بخيت اللي يخيم تحت ظله
انگلبت سيدي اليوم الموازين
اوصلنه الحال , ما واحد وصله
وصارت ناسنه.. مثل الثعابين
يا هو اتحركه .. ينفث بيك غله
الدنيه اتغيرت , واتغير البين
والكل تنتظر منك الزله
يوصينه النبي المختار , والدين
السؤال الغير رب الكون ذله
عله الدنيه السلام .. وگول امين
ما ظل لليون .. بس رحمة الله
