* وجدان النقيب
طلعيت الظال بيه
ما لحت من چتفي حيل
حتى روحي استغربتني
دردمت يغناي ويل
كلش استاحش ضحكتي!
ضحكة عالون طيب هيل
واگفه الكلمة اعله شفتي
خايفة يفز بيها ليل
ماكو وجهه اتلفت الها
والدرب عثرة وطويل
لملمت بوشال ناسي
وعاونت ظني العليل
كلها من عوزي تبرت
بس نده عيوني خليل
هنه عشرين وتعدن
بس عدال اثنعش جيل
آنه وين؟
مسودنه الصفنة اعله وجهي
وبين بروحي العطب
والخلگ كلش تعده
الآه واتحمل صعب
فرهديت الطيب من گلبي
العله طنوني لعب
وهمه كلهم ليل وادري
سوالف الظلمة چذب
وآنه حسراتي دليل الناي
من يوعى ويهب
وآنه صغت الآه غنوة
مو بطر لكن غصب
منها احلى وشال روحي
ومنها اتلافه العتب
ومنها اطيبلي عمر مگيود
بس سموه ذنب
