من يوم الموادع ذاك

كلشي البيه ما مرتاح

بطول ابعاده امد حسرات

واطش گصص عالگاع

لو جابولي طاري الراح

ااااااه يالراح

من فارگني حد اليوم

جفن اعله الجفن ما طاح

گام يمرني بس خيال

اشبگ بي او ما يلاح

وامد عيوني سچة ليل

يجزيهه القطار دموع

يوگف من يجي المصباح

مثل حالي اگلك حال

سفينه يگود بيهه الروج

هد سكانها الملاح

مثل حالي الگلك حال

گاع وفارگت فلاح

امطشر وادور آثار

ناسي تلمني بس شلون

شكاله او تلم بجناح