*.. الهدام ..
نهري وطفولتي ..،
وذاكرتي الأولى ..*
*.. يا نهري..
ركض عمري اعله جرفك..،
وانتَ وسط الروح تركض ما تنيت أحد.
…،
ركضنه اثنينه وما ينلحگ طولك..!
ترس حضني أضمك ردت وأعبر بيك..،
ذاك الصوب واتوسد:
البردي وريحة المحار..، وامن ابعيد
موگد هيل ما يبرد.
يا هدّام..
يالهدميت كل نومي..،
يا نهري اعله مايك كل زغر عفته..،
إو عفت حلوة ضفاير تشتعل بالخد.
يا هدّام..
وجهك فضة ليلة صيف..
من خدّك تراچي الحلوة والمعضد.
…،
يا نهري.. اشكثر ودّت مشاحيف العرس حلوات،
أصابعهن چفافي إترف عله اعيوني، المشاحيف
ابعرس حلوات..، واشگد بالرصاص الماي راح اورد.
…،
يا هدّام.. يا نهري..
ولا فاض النعاس ابرمشك إولا چلچلت للنوم..،
يالتمشي الزمن كلّه، وحيد، إولا گلت لحّد..،
شباب انتَ، ولا مستاحش إبدنياك.. روحك
تحضن انجوم وگمر بالليل..، وابعز الظهر هاي
الشمس غرگانة تستبرِد.
…،
كل خطوة گصيرة اتصير.. بس أوگف واغنيلك..،
يا نهر العشگ والليل، يمعبر السفن لآخر
گصب يتناك.
مدرسة الحرايب لِعب جرفينك.. ولا مرّة
يردك سد.
يمعزب..
تظل امعزب وتضوي الشمس روحك..
خبز تنّور حار اشفاف بوساتك عله
الخدين تتورد.
يا نهري.. بعد نخلات جدي اهناك..،
موش ابگاع.. فوگ الروح يتونسن…،
شدّينه العمر بحزام يمهن حيل.. لن العافية اتفلّه.
يملوّن اهدومي إبطين..،
شهگة سِعد بالحرّي.. ولا نشفن.
يا نهري اعله روجاتك محينه الزغر والگذلة..
محينه إو ما محينه الخاطر الثگلان.
يا هدّام.. يا نهري السنين إبمايك اتعبر العمر حدّار..،
وامغربه اعله روحي اتهدم اشيحله..!
مرّة أوگف واغنيلك..
حزن روحي يكفّي الماي البطولك..،
لون رايد عتب بالليل واتبدله.
…،
كل دنياك روحك ماي..
تلعب بالصور واتراگص النور، ايتطشر خدك إبوحده.
يا نهري.. عباتك طيّه وحده إو غطّت الصوبين..
ملفوفة حدر راسي مخدّه..، إو بالحلم بالروح متوسدة.
مرّة أوگف واغنيلك.. حلم غرگان بدموعي، اعله
ثوبي إمن الزغر تطريزتك وردة.
يا نهري.. الصبح مرشوش بتراب الدرب..،
والصف بعيد، إو روجتك سدّه.
وأسمر دفتر أول شوگ، گلبه الشمس بيه اتنام..،
ما طاح إبرگض.. مشدود بين الضلع والدشداشة
ألف شدّة.
ولو طولي گصير.. إو دار وي طولك فرد عگده.
يا نهري../ گمر تموز/ .. حط يم دارنه إبجرفك..،
وأحس طولي إعله طولك بالفرح عده.
…،
كل خطوة گصيرة اتصير.. بس أوگف واغنيلك..
يا هدام.. نارك تضوي/ أبوذيات/ .. بستاتك تشد الحيل.
يا نهري.. انخبط مايك/ بأنه الياويل/ ..،
فوگ امرايتك وجهي نزع لونه، مثل سمره انحنت
ترسم گصيبتهه وأخذها الليل.
يا نهري.. گلت لي امن الزغر../ مسموعة ونة الليل/.
والرگصة خناجر بالمضيف، وبالكحل مدفون خط الميل.
يا نهري.. لِعب مايك لعبنه امحاضن إوبات الگلب..،
والعشگ دومه إيميل.
يا نهري حلاتك سكتة نص الليل..
كل نجمة ابترافة اتطيح.. تسبح للصبح..،
والماي/ عرس الزين/.
…،
يا نهري.. خضار الگصب يم رجليك.. بوسه
إتيه بيهه العين!!
ضم الغيرة والغتره الگصب، غيمه ابحضن غيمة..،
خلك يجدح حِسن.. حد الحِسن لاوين..؟!
گبل النوم، يم كل باب أضمك.. خوفي لا تنباگك..
مو من باب، من كل باب أشوفك لو بياضك ضاگ.
يا نهري.. تفرهدنه ابرضاة العين..
خليني إبرضاتك بالحلم واشتاگ
…،
يا نهري.. ولو مجروح گلبي ابغيبة الخلاّن..
تظل الطيبة خيط أبيض يشد گلبين..
وانتَ اتصيح/ يا ريسان/ .
…. …. …. ….
ركضنه اثنينه إو ما ينلحگ طولك!!
كل خطوة گصيرة إتصير.. بس أوگف وأغنيلك.
*.. الهدام نهر معروف في ريف الميمونة/ العمارة وقد طمر بحملة تجفيف الأهوار. والقصيدة محاولة للغنائية والمرثاة حيث يمتزج الأمل باليأس .. من أجل انبثاق مياه جديدة في هذا النهر الخالد ..*
ثقافة شعبية
