بدر ما مات..
حي..
باقي بدر ما مات..
خالد للابد ما ينخفت بدره..
واذا مات الغريب اعله الخليج إيصيح
إذن.. ظل الغريب اليسمع الشعره..
بدر.. ورد البنفسج عالگبر خطار
يوميه يفتح بس إلك عطره
بدر.. حته شناشيلك بچت بالليل
لأن شباچ بيتك يعشگ الگمره
بدر.. حته – بويب – اشتاگلك لهفان
مثل سعف النخل من ينحني النهره..
بدر.. شط العرب
وجهه غريب اوياك
مثل تمثال طولك..
من حزن فجره..
بدر.. شمس العراق أحله
شمس بالكون..
وشمس هذا العراق
ابكل وكت شگره..
بدر.. حته النوارس سافرت وياك
لأن.. ما مش بعد عينك..
لگت عِشرة..
بدر..حته زمانك ما رحم وياك
وزمانك «يا بدر»..
خجلان من عذره
بدر.. چف الصبر
مزروع بيك اهموم
ويا چف.
بالصبر يتراهن ابصبره..
العجيبة.
البيك. روح اتحوم
فوگ عراق
وعراقك روحه بيك
إيطوف عالبصرة..
يا فيض الشعر. بسمك يّفيض اعتاب
نزف حته الشعر من
همل ابشعره
افك باب الشعر الگيك
ألف ديوان..
وألگه الوطن همك.. بالگلب جمرة
بدر.. قصة حياتك دونت تاريخ
بس تاريخ عمرك
ينحسب عمرة..