وين الكاك يل حتى بمرايا الطيف ماتنشاف ماتنجاس
 يالماخذ الواهس والحلم وياك
 يمذوب شموعي بصفنة الوهواس
وين الكاك كون الكاك ..
ولو رشفة ندى مترب واكولن من تصح لاباس
ولو نسمة عطر جلمة تهز بيه وتر حساس
 ولو رعشة على جفوفي
من روس الاصابع بالدمع تنباس
وين الكاك ياسبحة سنيني المن أصابيعي
انفرطت مثل خيط الماي
يا كلبي الطلع دامع من عيوني بجنح لحظة
مثل ما ينكطع ويضيع خيط نعاس
 يا واهس الغبشة بروح عصفورة ندى تمشط زلوف الياس
 عصفورة حدايق مادة الجنحين مرجوحة مرح بين الشجر والياس
وين الكاك كل شي بلا طعم لا سالفة بلياك
بعدك ماصدح صبح البلابل بالنفس .. لافاخ مني الراس
صفنة ولا هوه يحرك غصن مياس
 دنيا بلا وجه وياي دنيا شفافها بوس إعلى ناس وناس
 دنيا بلا طعم لا لون دنيا بلا ضــوه بلياك
 وحشة المكبرة بلياك وين الكاك كون الكاك ..
كون ترد علي .. كون يحصل ملكاك
 جا ردت الدنيا وياك
جا ردت عروس ثيابها انا وياك
 جا دكت ايامي الصافنات اجراس
جا مدت الكمره بساطها وبات الكمر بالكاس
كمره تحل ضفايرها خمر فضي يركص الكاس
والوحشة وخصر دنياي والاحساس
ومراجيح الضوه بعيني وعشب روحي ويفوخ الراس
 كون الكاك .. وين الكاك ..