الصبح..
طشت عصافيره
ونست بعشوشهه أسرار الرياح
الصبح.. راح
لملم الظلمة وشمرهه
وعدهه موعد
من يجي الليل وتردله
اتكابله وتتناوب اوياه النواح
اتكابله ابجيه العصافير …
.. مسكينة العصافير
من ترعد سمه اتخاف العصافير
مثل حال النهر من ينشف
ايدوهن نواعير
***
الظهر..
من تكسر ظهرهه الشمس
وتشوف النهار
تضوي جبهتهه الحزينة
اتوزع أخبار الحروب
وتنشر ألوان الخراب
عله الوادم.. ديرة ديرة
وباب باب
الظهر شاهد عالنهار
بيده مفتاح الضوه وباب المزار
***
العصر..
من اتدير شمس الله ظهرهه
خطوة.. خطوة
اهناك واتسلم على (الكاظم):
سلام الله
وعله اسياج الغروب اتنام واتودعه:
على الدنيه السلام
امودع ابحزن العراق
وروح نام
نااااااااام
(الك رب الما ينام)